50/50

قصيدة وحشة

أو نص نص

أو قول هي وحشة عشان نص نص

نص دنيا

نص شمس

نص غنوة بين بوح وهمس

عشان فيه علامة

علي كل كلمة




يكون ليها معني بدون أي لبس

عشان فيه قمر

مش قمر

برضه نص

عشان فيه حنان

مش حنان

نص حضن




نص أشواق واخدة ركن

زي نص رغيف

هو نص رغيف

وبس

قصيدة مش وحشة

ولا حلوة




لا تلقي لا استهجان ولا استحسان

قصيدة ما تأثرش في الإنسان

لا تجيب رغيف

ولا لعبة ولا كيس برتقان

قصيدة زي الشعر في العالم

قديم

مبحوح

جبان

***
‏‏


قصيدة زي البحر بين قضبان

قديمة زي الصمت

زي الفرجة في الخناقات

زي التزام الانضباط والربط

زي اللقا بالصدفة

زي الضحك في الجنازات

وزي نسيان اللي مات

وزي فستان البنات

مقطوع عند الكتف

ومرفي بين النهد والدراعات

زي الولد ما يضيع

وصورته تنتشر في الإعلانات‏..‏

ارجع لأهلك يا ابراهيم ما تخافش

زي ابراهيم

ضايع

وما بيرجعش

‏
***‏


قصيدة متلخبطة

أولها كان مرعوش بيتلجلج

وآخرها ماشي ع الإيقاع مظبوط

زي العساكر

في طريق الموت‏.‏
BAHAA Gahin in AlAhram newspaper

http://www.ahram.org.eg/Index.asp?CurFN=AMOD20.HTM&DID=9560

yes, life become 50/50