دستور يا اسيادنا

فى قعدة لطيفة مع شوية بنات لطيفة اتكلمنا فى موضوع لطيف
البنات دول علاقتهم بالسياسة تنحصر فى مادة حقوق الانسان اللى بياخدوها فى الكلية (اذن العلاقة بين السياسة وحقوق الانسان واضحة جدا ) ده اولا
ثانيا الموضوع اللطيف هو ليه مفيش تمثيل قبطى فى اى انتخابات
المهم انا قلتلهم طبعا دى غلطتنا علشان مش بنرشح ولا نترشح
فردوا بان ماهو اصلا ماينفعش يبقى رئيس الجمهورية قبطى
انا: ليه يا جماعة؟
هن: علشان الدستور بيقول كده
انا: الدستور مااشترطش ديانة المرشح
هن: لا احنا اخدنا فى مادة حقوق الانسان فى الكلية ان المرشح لازم يبقى مسلم
انا: يا جماعة الدستور مش بيقول كده
هن: يا بنتى احنا اخدناها فى الكلية، انتى بتكلمى فى ايه
طبعا الموضوع ده وجعنى جدا جدا
بعد البحث والتقصى وصلت للصفحة دى: دستور جمهورية مصر العربية على موقع بوابة الحكومة الالكترونية
وفى الباب الخامس: نظام الحكم
الفصل الاول: رئيس الدولة
مادة(75): يشترط فيمن ينتخب رئيسا للجمهورية أن يكون مصريا من أبوين مصريين، وأن يكون متمتعا بالحقوق المدنية والسياسية، وإلا تقل سنه عن اربعين سنة ميلادية.
اهه اهه ادى الدستور على موقع الحكومة ماجبش سيرة ديانة المرشح
المهم رجعت لواحدة من مجموعة النقاش ووريتها الصفحة فردت بان الكتاب بتاع الكلية مابيقولش كده
طبعا انا مش عايزة ارشح نفسى ولا حاجة انا بس كبرت فى دماغى انى اوصل لمصدر المعلومة
السؤال بقى: اى الكتابين اصح: الدستور على موقع الحكومة ولا كتاب حقوق الانسان اللى فى الكلية؟
هل ممكن يتم تزوير الدستور فى كتاب جامعى على اعتبار ان ماحدش حيقرا الدستور والناس حتكبر دماغها؟
هل الطلبة اللى درسوا الكتاب ده ممكن يتغير عندهم فكرة فضلوا يذاكروها سنة بحالها؟
والاهم: هل الطلبة الاقباط وصلهم احساس ناس كتير يهمها تزرعه فيهم: انتوا ضيوف وخواجات؟ ولا حاربوا الاحساس ده داخلهم
على اى الاحوال وفى الختام: اتمنى ان اللى يروح ينتخب فى اى انتخابات ايا كانت يبقى على اساس معيار الكفاءة مش اى حاجة تانية
وبرضه مساء الخييييييييييييير يا مصر

مساء الخييييييييييييييييييييييييير

ليه مش حيبقى عندنا مفاعل نووى ولا حتدخل اى جامعة من جامعاتنا قائمة اهم 500 جامعة فى العالم
علشان حالة التحشيش العام اللى بقينا فيها
مثال:
امبارح رحت لنجار علشان ييجى يصلح لنا حاجات فى البيت
وانا عمالة اشرحله الموقف وايه المطلوب
فاجأنى بالآتى:
- مش انتى بنت الدكتور؟
- ايوة
- هو مش باين ليه؟
- (اتساع فى حدقة العين - فتح الفم لآخره - كتم الصوت: باختصار تنحت)
- هو الله يرحمه ولا ايه؟
- (ردى عليه تكون من كلمة واحدة) 2001
- ياااه ده من مدة يعنى

طبعا النجار التايه دة لا جه ولا صلح ولا نيلة
ملاحظات مهمة جدا لتوضيح الصورة:
- النجار ده فى شارعنا
- لازم نعدى عليه على الاقل 5 مرات كل اسبوع (اى فرد من الاسرة) فى طريقنا لاى حتة
- بعد وفاة ابويا انا وامى واختى كنا كلنا لابسين اسود طبعا لشهوووووور

بمعنى: الراجل ده اخد 8 سنين علشان يلاحظ ان جار له اتوفى
واخيرا: مساء الخيييييييييييييييييييييييييييير يا مصر