هو انا من عصر السينما الصامتة؟
انا ماليش فى التليفزيون ولا فى الافلام او البرامج العربى ... انا اللى باجيبه لنفسى
امبارح باتعشى وحاطه الجرنان جنبى باقلب فيه (ايوة باعمل الحاجتين فى وقت واحد) وكالعادة التليفزيون مفتوح خلفية صوتية كده
انا مش باتفرج عليه انا كنت مركزة فى الجرنان
وحد غلط وقال لى (الريموت جنبك هاتى البيت بيتك) وماله .. برنامج برضه محترم وبيقدمه محمود سعد راجل محترم وعلى القناة الحكومية الرسمية قناة محترمة برضه
ولما قللبت كان فى اللحظة اللى بيعلن فيها محمود سعد خبر حيهز الدنيا وينسى الناس طوابير العيش وانفلونزا الخنازير واعدام هشام طلعت مصطفى
الخبر الجبار ده هو انه حيستضيف ابطال فيلم دكان شحاتة
عادى جدا وايه يعنى ... بتحصل
مذيع وممثلين وحركات والفيلم رائع والممثلين هايلين والفيلم ده ماحصلش
وانا فى عقلى باقول انا مالى كلها دقايق واقوم اسيب الاوضة دى خالص
لكن قبل ما اعمل كده ابتديت الفقرة المميزة المعجزة الهايلة اللى ماحصلتش
مش ناوية اركز قوى فى التفاهات اللى سمعتها من طقم الفيلم لانه فعلا كلام يجيب الضغط وعسر الهضم
المهم اللى شالنى وجنننى وخلينى اتخض من اللى باسمعه هو كلام المذيع المحترم محمود سعد وهو بيلعلع ويقول على الممثلة انها "مُزة" وعلى الممثلين انهم "صايعين تمثيل" ..... نركز مع بعضينا تانى
برنامج موجه للأسرة كلها على القناة الحكومية الرسمية بيتقال فيها الكلام ده
مش كفاية الراجل اللى بيعلم البصبصة بتاع "موز .. موز" اهو على الاقل على قناة خاصة طالع يقرفنا فيها بفلوسه
لكن القناة الرسمية الحكومية بيتكلموا فيها كده
يا جماعة حد يفهمنى هو مش الكلام ده كان عيب ولا هما غيروه ولا ايه؟
طب مش حد يقول
زمان كانت الوالدة بتزعقلنا لما نقول الكلام ده .. طب ايه بقى؟ كانت بتخنقنا وخلاص
والكلام ده جميل وفل الفل واحنا اللى من عصر السينما الصامتة؟
يا جدعان حد يفهمنى
انا مش باتكلم من منطلق دينى وحركات و"لا تخرج كلمة ردية من افواهكم بل كل ما كان صالحا للبنيان حسب الحاجة كي يعطي نعمة للسامعين (اف 4 : 29)
"
انا مش قصدى كده خالص
انا باتكلم من منطلق اجتماعى اخلاقى .. ذوق حس
ينفع الكلام ده يتقال فى الاعلام الموجه للأسرة ويسمعه الصغيرين قبل الكبار؟
Posts
3 comments:
no mosh yanfa3, But are you sure that he said moza and other stafe. plz let you more specific and tell us about whom he was talking?????????? wa 3agabe.
SH.M
we are in the era of "media competition " i assume there is a hidden war between night shows as : العاشرة مساءا - البيت بيتك - 90 دقيقة - القاهرة اليوم
the warriors ( presenters ) tools are : being funny - using modern languastic words and so.....
so this is how war runs !!!!!!!!!!
yes I know what you mean, and I totally agree with you!
I've been away from your blog for sometime, and it seems I've got a lot of homework to do!
So keep up the good work :)
cya!
Post a Comment